ASF hri leng chungchangah mipui hriattur tarlang

by News Editor

Tualchhung News

Zoram Today Aizawl, the 30th May 2024 : Kumin March thla khan, kum 2022-ah pawh lo leng tawh African Swine Fever (ASF) chu Mizoramah leng lehin, vawk tam tak chan leh a ni a. He hri hi ran vulhtute tana channa nasa tak thlen thei a nih avangin, hri darh zel thei laka invenna tura inkaihhruaina tha tak a awm ngei a tul a hriat a nih thu vawiin a sorkar thuchhuah chuan a tarlang.

Mizoram Chief Secretary Dr. Renu Sharma, State Executive Committee, Mizoram State Disaster Management Authority Chairman ni bawk chuan, Disaster Management Act, 2006, Section 24(1) in thuneihna a pek angin, a hnuaia thupekte hi a chhuah a ni.

1. Thu leh awm hma zawng, Mizorama vawk, a sa leh, Vawksa atanga siam thil eng pawh, ram chhunga state dang leh ram dang reng reng atang pawh a lak luh khap tlat a ni.

2. Animal Husbandry & Veterinary Department, Government of Mizoram chuan, vawk vulhna hmunhma reng rengte vawn fai kawngah hma a la tur a ni a; natna kai nia rinhlelh vawkte chu , dah hran theihna turin hma an la tur a ni.

3. Animal Husbandry & Veterinary Department, Government of Mizoram chuan, 'National Action Plan for Control, Containment and Eradication of African Swine Fever-in inkaihhruaina a siam ang ngeiin, vawk thite chu tihral a nih theih nan hma a la ang.

4. A hmun ngei a hma lakna piah lamah hian, Natna vang ni thei awm a vawk thite chu, Department Helpline Number 1962-ah emaw, a hnuaia tarlan number-ahte hian inhriattir zel tur a ni ang.

9366984867

9436142908

9436140179

A chunga inkaihhruainate khi, National Action Plan for Control, Containment and Eradication of African Swine Fever-in a phut ang a duan an ni.

Sorkar thuchhuah chuan, thupek hi Chief Minister leh State Disaster Management Authority Chairman-te hriatpuina ngeia chhuah anih thu an tarlang.